ප්‍රාදේශීය ලේකම් කාර්යාලය - මධ්‍යම නුවර ගම්පළාත

මධ්‍යම නුවරගම් පළාත ප්‍රාදේශීය ලේකම් ඩී.එම්.සුදර්ශන දිසානායක මහතාගේ අධීක්ශණය යටතේ කාර්යා⁣ලයේ සංවර්ධන අංශය මඟින් වාර්ෂිකව පවත්වනු ලබන ලේ දන්දීමේ කඳවුර 16 වන වතාවටත් 2026.03.09 දින කාර්යාලයීය ශ්‍රවණාගාරයේ දී පැවැත්වීය. අනුරාධපුර ශික්ෂණ රෝහලේ ලේ බැංකුවේ වෛද්‍ය, හෙද ඇතුළු කාර්ය මණ්ඩලයේ සහයෝගය සහ ඇක්වා එයිඩ් පදනම අනුග්‍රහයක දායකත්වය යටතේ සංවිධානය වූ මෙම වැඩසටහන සඳහා සිය දෙනෙකුට අධික රුධිර පරිත්‍යාගශීලීන් සහභාගී විය. රුධිර පරිත්‍යාගශීලීන් සඳහා ඇගයීමේ සහතික පතක් හා සමරු තිළිණයක්ද මෙහිදී පිරිනැමීමට කටයුතු කරන ලදි.

ශ්‍රී ලංකා අපනයන සංවර්ධන මණ්ඩලය මගින් සංවිධානය කරන ලද අනුරාධපුර දිස්ත්‍රික් ව්‍යවසායකයින් සඳහා සන්නාමකරණය සහ ඩිජිටල් අළෙවිකරණය පිළිබඳ දැනුවත් කිරීමේ වැඩමුළුවක් 2026.02.17 දින මධ්‍යම නුවරගම් පළාත ප්‍රාදේශීය ලේකම් කාර්යාලීය ශ්‍රවණාගාරයේදී පැවැත්විය.

මෙහි මූලික අරමුණ වූයේ ව්‍යවසායකයන්ගේ නිෂ්පාදන අලෙවිය ප්‍රවර්ධන කිරීමයි. ඒ සඳහා නිෂ්පාදන සන්නාමකරණය, ඩිජිටල් අලෙවිකරණය විද්‍යුත් මෙවලම් යොදා ගන්නා ආකාරය සහ එමඟින් එම නිශ්පාදන විදේශ වෙළෙඳපොළ වෙත ඉදිරිපත් කරන ආකාරය පිළිබඳ දැනුවත් කෙරිණි.

මේ සඳහා අනුරාධපුර දිස්ත්‍රික්කය පුරා විසිරී සිටින අපනයන විභව කාන්තා ව්‍යවසායකයින් ප්‍රමුඛ ව්‍යසායකයින් හැට දෙනෙක් (60) සහභාගී වූ අතර අපනයන සංවර්ධන මණ්ඩලය සම්පත් දායකත්වය සපයන ලදී.

මෙම වැඩමුළුව මධ්‍යම නුවරගම් පළාත ප්‍රාදේශීය ලේකම් කාර්යාලය සංවිධානය කළ අතර මේ සඳහා ශ්‍රී ලංකා අපනයන සංවර්ධන මණ්ඩලයේ වයඹ පළාත් කාර්යාලය නියෝජනය කරමින් නියෝජ්‍ය අධ්‍යක්ෂ මනෝරි කුලසේකර මහත්මිය, අපනයන සංවර්ධන මණ්ඩලය මණ්ඩලයේ ප්‍රධාන කාර්යාලය නියෝජනය කරමින් නියෝජ්‍ය අධ්‍යක්ෂ කේතකි කුලපාල මෙනවිය ඇතුළු නිලධාරින් සහ මධ්‍යම නුවරගම් පළාත සහකාර ප්‍රාදේශීය ලේකම් නිමේෂ් මධුශංඛ මහතා ඇතුළු ප්‍රාදේශීය ලේකම් කාර්යාල නිලධාරින් සහභාගී විය.

මධ්‍යම නුරගම් පළාත ප්‍රාදේශීය සම්බන්ධීකරණ කමිටු රැස්වීම 2026.02.24 දින ප්‍රාදේශීය සම්බන්ධීකරණ කමිටු ගරු සභාපති අනුරාධපුර දිස්ත්‍රික් ගරු පාර්ලිමේන්තු මන්ත්‍රී මහාචාර්ය සේන නානායක්කාර මහතාගේ ප්‍රධානත්වයෙන් පැවැත්වීය.මධ්‍යම නුරගම් පළාත ප්‍රාදේශීය සම්බන්ධීකරණ කමිටු රැස්වීම 2026.02.24 දින ප්‍රාදේශීය සම්බන්ධීකරණ කමිටු ගරු සභාපති අනුරාධපුර දිස්ත්‍රික් ගරු පාර්ලිමේන්තු මන්ත්‍රී මහාචාර්ය සේන නානායක්කාර මහතාගේ ප්‍රධානත්වයෙන් පැවැත්වීය.
එහිදි 2025 අවසන් සම්බන්ධීකරණ කමිටුව වෙත යොමු කර තිබු ගැටළු සම්බන්ධයෙන් ගනු ලැබූ තීරණ වලට අදාළ ප්‍රගතිය පිළිබඳව සාකච්ඡා කරන ලදී. අනතුරුව මෙදිනට ලැබි ඇති ලිපි සම්බන්ධයෙන් සාකච්ඡා කිරීමෙන් පසු කෘෂිකර්ම, වාරි මාර්ග, වන සංරක්ෂණ, වන ජීවි, සෞඛ්‍ය සේවා, පුරාවිද්‍යා, නැවත පදිංචි කිරීම් සහ මහජනතාව විසින් කර ඇති ඉල්ලීම් හා ගැටළු වලට අදාළ ක්ෂේත්‍ර පිළිබඳ සාකච්ඡා කරන ලදි.
මෙම අවස්ථාව සඳහා මධ්‍යම නුරගම් පළාත ප්‍රාදේශීය සභාවේ ගරු සභාපති ආර්.බී.ඩබ්.සී.වන්නිනායක, අමාත්‍ය ගරු වසන්ත සමරසිංහ මහතාගේ සම්බන්ධීකරණ ලේකම් ප්‍රියන්ත රත්නායක, සම්බන්ධීකරණ ලේකම් ආර්.ජී.දිසානායක, මධ්‍යම නුවරගම් පළාත ප්‍රාදේශීය ලේකම් ඩී.එම්.සුදර්ශන දිසානායක, සහකාර අධ්‍යක්ෂ (සැලසුම්) රුවන් නයන අබේරත්න, මධ්‍යම නුරගම් පළාත ප්‍රාදේශීය සභාවේ ගරු මන්ත්‍රීවරු, රාජ්‍ය නිලධාරින් ඇතුළු මහජනතාව බොහෝ දෙනෙක් සහභාගී වුහ.

අභිමානවත් 78 වන ජාතික නිදහස් දින සැමරුම අනුරාධපුර, සාලියපුර “ශාන්ති සේවන” රජයේ වැඩිහිටි නිවසේදී උත්කර්ෂවත් අන්දමින් සමරනු ලැබීය.

සෑම වර්ෂයකම වැඩිහිටි නිවසේ නේවාසික ජ්‍යෙෂ්ඨ පුරවැසියන් සමඟ ජාතික නිදහස් දිනය සමරනු ලබන අතර මෙවරද මධ්‍යම නුවරගම් පළාත ප්‍රාදේශීය ලේකම් ඩී.එම්.සුදර්ශණ දිසානායක මහතාගේ ප්‍රධානත්වයෙන් පවත්වන ලදී.

එහිදි ප්‍රථමයෙන් ජාතික ධජය එසවීමෙන් අනතුරුව ජාතික ගීය ගායනා කර ආගමික වතාවත් සිදු කරන ලදී. වසර 78 ක් පුරාවට අප මාතෘ භූමිය නිදහස්, නිවහල්, ස්වෛරී රාජයක් ලෙස ගොඩ නැංවීම උදෙසා ඇස්, හිස්, මස්, ලේ,  දහඩිය වගුරුවා දිවිහිමියෙන් ජීවත පූජා කළ දැයේ විරුවන් සිහිපත් කළ අතර එම අය විසින් අපට උරුම කර දුන් නිදහස අර්ථවත් ලෙස ගත කරමු යන්න ප්‍රාදේශීය ලේකම් සුදර්ශණ දිසානායක මහතා විසින් ප්‍රකාශ කරන ලදී.

තවද, වැඩිහිටි නිවාසයේ වාට්ටු පිරිසිදු කර එම වැඩිහිටයන් උදෙසා දිවා ආහාරය ලබා දීමේ පිං කටයුත්තද ප්‍රාදේශීය ලේකම් කාර්යාලයේ නිලධාරින්ගේ මැදිහත් වීමෙන් සිදු කරන ලදී.

මෙකී අවස්ථාව සඳහා උත්තරසාලිය ශ්‍රී දළදා රජමහා විහාරයේ විහාරධිපති ශාස්ත්‍රපති පණ්ඩිත පූජ්‍ය විලච්චියේ සද්ධානන්ද ස්වාමින් වහන්සේ, සහකාර ප්‍රාදේශීය ලේකම් නිමේස් මධුසංඛ, සහකාර අධ්‍යක්ෂ (සැලසුම්) රුවන් නයන අබේරත්න, පරිපාලන නිලධාරි අජන්තා ආරියසිංහ, පරිපාලන ග්‍රාම නිලධාරි ඇතුළු ප්‍රාදේශීය ලේකම් කාර්යාලයේ නිලධාරින් සහ ශාන්ති සේවන රජයේ වැඩිහිටි නිවාසයේ ස්ථාන භාර නිලධාරි ජේ.එස්.එන්.ජයවීර මහතා මෙන්ම කාර්ය මණ්ඩලය සහ වැඩිහිටියන් බොහෝ  දෙනෙක් සහභාගී වූහ.

සටහන:

එම්.ඩබ්.කේ.ජයලත්.

පරිසර සංවර්ධන නිලධාරි